Alun yn Dweud ei ddweud ar Radio Cymru, 9 Rhagfyr 2009
Bore da!
Pwy oedd yr offeiriad oedd yn cwyno am eiriau siwgwrllyd rhai carolau, dedwch? Heddiw, ar fore datganiad o fwriad gan y Canghellor, pwy a’i law ar ei galon all ganu ‘Nid wy’n gofyn bywyd moethus, aur y byd na’i berlau mân’?
Fe fydd ein holl sylw ni ar yr hyn a fydd gan Alastair Darling i’w ddweud yn ei Gyllideb. Sut y gall y Canghellor adnewyddu’r economi? Fe ŵyr beth yw’r disgwyliadau. Ac mae’n llawn sylweddoli y gall codi trethi ostwng y bleidlais.
Sut y bydd hi’n effeithio arno
‘Beiwch y bancwyr’ yw’r gri. Toll ar eu trachwant. Trethiant ar fethiant. Welwch chi’r bras-benawdau? Yn y cyfamser mae cyllid derfynol Llywodraeth y Cynulliad ar gyfer economi Cymru 2010/2011 wedi cymryd i ystyriaeth sut i rannu’n deg rhwng gofynion yr amgylchedd a chefn gwlad ac addysg, iechyd a gofal cymdeithasol a llywodraeth leol a phlant ... a phopeth. A diolch fod yna arbenigwyr ar gael i ddehongli a chynghori ar y materion dyrys yma; wel, dyrys i mi sut bynnag.
Ydi, mae’n ‘ganol gaeaf noethlwm.’ Beth am y garol honno:
Beth a roddaf iddo, llwm a thlawd fy myd? Pe bawn fugail rhoddwn orau’r praidd i gyd; Pe bawn un o’r doethion gwnawn fy rhan ddi-goll; Ond pa beth a roddaf? Fy mywyd oll.
Nid siwgwr ond sbeis!
Bore da!